Boond.

Lelahatey patton ke beech se

Ek boond tapak jaati hai

Mitti ke seene se

Ek saundhi khushboo ke saath lipat jaati hai

Har zarrey mein

Ek ankahi daastaan hai

Pattey ke har reshey mein

Usi Boond ki kahani hai

Khush kar deti hai hawa

Jab kahin chehre se khe jaati hai

Kahin door se ek boond

Palkon par gir jaati hai

Aankhen band hotey hi

Door kahin ek sapna jaagta hai

Dil ke kone mein mehfooz

Ek chhoti si baat suna jaata hai

Khuli baahon mein

Baarish ke aagosh mein

Barastey aasman ke tale

Woh sapna haule se gungunaata hai

Bas wahin door uska

Chera nazar nahin aata hai…

Aankhen khultey hi

Sapna phir dubak ke baith jaata hai

Aankhon ka paani

Ashq banker usi boond se mil jaata hai

Ek chhoti si muskuraahat

Dil ke kone mein gum, us awaaz ko dhoondti hai

Aur aankhen ek baar phit

Band honey ka intezaar karti hain